Al turnier da tennis a Roma ha Martina Hingis pudì festivar sia 55avla victoria en il dubel. Ensemen cun sia partenaria Sania Mirza ha Hingis gudagnà il final cunter il duo russ Jekaterina Makarowa/Jelena Wesnina en trais sets cun 6:1, 6:7 e 10:3.
En il singul ha Serena Williams gudagnà. L'Americana ha battì en il final sia cumpatriota Madison Keys en dus sets cun 7:6 e 6:3. Igl è l'emprima victoria da Williams quest onn e la 70avla en sia carriera.
Collavuraziun fritgaivla
Per Hingis èsi stà il 55avel titel da dubel (dasper 43 da singul), e gia il tschintgavel da quest onn. Uschia èn Hingis/Mirza puspè sa posiziunadas cleramain sco favuritas per il French Open che cumenza en in’emna.
Il turnier Roland Garros è il sulet dal Grand Slam che la Svizra da 35 onns e sia partenaria da l’India (29) n’han anc betg gudagnà ensemen. Ellas giogan dapi 14 mais ensemen.
RR novitads 17:00 / RR Sportissimo 17:00