Hingis/Mirza: 40 giadas senza perder

Martina Hingis e sia partenaria da dubel Sania Mirza n’èn vinavant betg da franar. Il duo ha gudagnà al turnier da WTA a Son Petersburg il final cunter Vera Duschewina e Barbora Krejcikova cun 6:3 e 6:1. Quai munta: gia 40 victorias en seria.

Hingis e Mirza sa legran d'in'ulteriura trofea.

Legenda da maletgs: Betg da franar: las giugadras da tennis Hingis e Mirza sa legran d'in'ulteriura trofea. Keystone

La davosa giada han Hingis e Mirza pers l’avust 2015 a Cincinnati cunter las soras Chan.

En il gieu final a Son Petersburg n’han las duas victuras laschà nagina schanza a Duschewina/Kreijcikova. En l’emprim transit ha in break cun il resultat 3:2 tanschì per segirar il set, en il segund set han Hingis/Mirza schizunt prendì giu trais giadas il service. Suenter be 56 minutas han ellas lura tratg a niz l’emprim matchball e gudagnà.

Suenter lur triumf a l’Australian Open e las victorias da turnier a Sydney, Brisbane ed als finals da WTA 2015 a Singapur è la victoria en la metropola russa gia la 9avla en seria. Totalmain han Hingis/Mirza uss gia gudagnà 54 turniers en il dubel.

RR novitads 15:00