Siglir tar il cuntegn

Naziunal/Internaziunal Hediger sprinta a meglier resultat da carriera

Als sprints da passlung a Toblach ha Jovian Hediger procurà per il punct culminant ord vista Svizra. El ha cuntanschì il final ed è vegnì quart la fin finala.

En il spurt final han 0,25 secundas mancà a Jovian Hediger per il terz plaz.
Legenda: En il spurt final han 0,25 secundas mancà a Jovian Hediger per il terz plaz. Keystone

Jovian Hediger ha mussà en il Tirol dal Sid la pli constanta prestaziun dals Svizzers. Sco 11avel meglier da la qualificaziun ha el gudagnà ses quartfinal. Il mezfinal è el bain mo vegnì quart, quel era dentant uschè spert en cumparegliaziun cun tschel mezfinal, ch’igl ha anc tanschì per Hediger per il final.

Pauc ha mancà per il podium

Er en il final è il passlunghist svizzer ch’ha festivà dacurt ses 25avel anniversari adina stà datiers d’in plaz da podest. En il spurt final han 0,25 secundas mancà ad el per il terz plaz. Tuttina è il quart plaz da Hediger la meglra prestaziun da sia carriera – avant era quai il 6avel plaz.

Cologna gia crudà ora en il quartfinal

Gudagnà il sprint ha Federico Pellegrino. Il Talian aveva gia gudagnà la fin d’emna passada a Tavau il sprint. Il final da las dunnas ha la Norvegiaisa Maiken Caspersen Falla gudagnà. La Svizra Laurien Van der Graaff ha bain cuntanschì il mezfinal, là è ella dentant crudada ora sco 5avla.
Gia crudà ora gia en il quartfinal èn Dario e Gianluca Cologna sco era Roman Schaad.