Cun questa collavuraziun vulan ils dus clubs, il HCD e Hockey Thurgau, manar il hockey en la Svizra Orientala in pass enavant. En emprima lingia duain juniors d’elita dal HCD, che na vegnan betg da far il pass en l’emprima equipa, pudair midar tar Hockey Thurgau per rimnar là experientschas en la liga naziunala B.
Tenor Beni Winkler, il trenader assistent da Hockey Thurgau, profiteschia dentant era il club da la Turgovia da questa collavuraziun. Winkler spera era che in ni l’auter giugader da Hockey Thurgau possia en l’avegnir forsa giugar tar il HCD, malgrà che la differenza tranter la liga naziunala A e la B saja enorma. Beni Winkler sez ha dà durant set stagiuns a Tavau e gudagnà durant quai temp trais titels da campiun svizzer cun il HCD.