Siglir tar il cuntegn
cuntegn

Naziunal/Internaziunal Haris Seferovic mida da la Bundesliga en il Portugal

Il giugader da la naziunala svizra da ballape ha confermà suenter il final da la cuppa tudestga, ch’el midia da Eintracht Frankfurt tar Benfica Lissabon. Il final da la sonda saira a ses club pers cunter il BVB cun 1:2.

Il giugader da ballape Haris Seferovic
Legenda: Haris Seferovic durant il final da la cuppa tudestga, che ses club la Eintracht perda cun 1:2 cunter il BVB. Keystone

Il giugader svizzer da 25 onns ha suttascrit tar il campiun portugais in contract da 5 onns. Benfica haja mussà il pli grond interess ed el vulevia puspè ina giada ina midada. El sa legria sin la nova sfida, ha ditg Seferovic.

Ina terrada en il final DFB

En il final da la cuppa tudestga da sonda saira cunter Borussia Dortmund tutga Seferovic ina giada la pitga. E bain vegn ses club la Eintracht d’egualisar avant la pausa in retard. Grazia ad in gol da penalti gudogna il BVB dentant la finala per la quarta giada en si’istorgia il pocal tudestg.

Nagin futur tar la Eintracht

Haris Seferovic aveva midà il 2014 da Real Sociedad San Sebastian a Frankfurt. Cun la Eintracht ha el dà 86 gieus en la Bundesliga, e sajettà 16 gols. Il club n'ha betg prolungà il contract che scada la stad.

RR novitads 06:00