Duas cursas avant la fin ha Nico Rosberg in avantatg da 19 puncts sin ses collega da la squadra da Mercedes, Lewis Hamilton. Uschia pudess el gia la dumengia segirar ses emprim titel sco campiun mundial.
Hamilton in dieschavel secunda avant Rosberg
Malgra che bler pleda actualmain per in triumf da Rosberg na vul Hamilton anc ditg betg bittar la faultsch en il chanvà. En la qualificaziun è el sa preschentà sco sfida ed ha segira sia 60avla pole position, quai cun in avantatg da 0,102 secundas avant ses concurrent Rosberg.
Ràikkönen sin plazza 3
Suenter l’extraordinari duo da Mercedes sa metta il Finlandais Kimi Räikkönen sin Ferrari sin plazza 3. La segunda retscha da start vegn cumplettada tras il pilot ollandais da Red Bull Max Verstappen. Sebastian Vettel en il segund Ferrari ha stuì esser cuntent cun posiziun 5.
Sauber a la fin da la cua
Per il team da Sauber hai danovamain dà ina sconfitta. Il Svedais Marcus Ericsson ed il Brasilian Felipe Nasr han desditg en l’emprima part da la qualificaziun cun ils plazs 21 e 22. Cunquai ch’il Franzos Esteban Ocon sin Mercedes da Manor e anc vegnì chastià ruschnan tant Ericsson sco Nasr mintgamai ina posiziun enavant.
RR Sportissimo 17:00