Ad Adelboden è gia baud vegnì fatg in deposit da naiv, bun dus kilometers davent da la pista, en in lieu sumbrivaun ed er pli fraid. Cun camiuns è vegnì transportà las davosas emnas radund 6’500 meters cubic naiv artifiziala sin la plaunca dal Chuenisbärgli. Ils davos dis è lura vegnì sprizzà blera aua per che la pista vegnia dira e cumpacta.
FIS dat glisch verda
Pir avant in’emna aveva la Federaziun internaziunala da skis FIS dà glisch verda als dad Adelboden. Quai er grazia a la buna lavur e la gronda experientscha da Hans Pieren ch’è gia varga 20 onns schef da cursa ad Adelboden.
In plan B n’haja quai mai dà, di il president dal comité d’organisaziun, Peter Willen. Las cursas da skis ad Adelboden sajan da enorma impurtanza per l’entira regiun. Quai saja propi il eveniment per Adelboden. Per questa cursa vegnia lavurà l’entir onn, ha ditg Willen.
60 onns Adelboden
Quest onn po Adelboden er gist festivar in giubileum. Igl è numnadamain la 60avla ediziun dals dis da skis internaziunals ad Adelboden. Sin il program stattan la sonda il slalom gigant dals umens e la dumengia il slalom dals umens.
RR Actualitad bunura 06:00