Siglir tar il cuntegn
Inhalt

Naziunal/Internaziunal Grond triumf per Simon Spilak a Sölden

Il Sloven a gudagnà la 7avla etappa dal Tour de Suisse da Zernez a Sölden en l'Austria. Grazia a questa victoria surpiglia il victur dal Tour de Suisse 2015 era la testa dal classament general.

In ciclist che tegna si ils bratschs per giubilar
Legenda: Suenter bunamain 4 uras cuntanscha Simon Spilak l'arrivada sin 2'780 meters sur mar sco victur. Keystone

Sin il lung traject final fitg stip ha Spilak distanzià ses concurrents in suenter l'auter. Var 10 kilometers avant l’arrivada è restà mo anc in trio: Simon Spilak, ses gidanter Rein Taaramae da l’Estonia e l’American Joe Dombrowski. La finala ha il ciclist da 30 onns era laschà davos el quels dus, ed è arriva solo sisum al pe dal glatscher Tiefenbach.

Pozzovivo be in di a la testa

Era l’emprim dal classament general suenter l’arrivada a La Punt, il Talian Domenico Pozzovivo n'a betg pudì suandar. 13 kilometers avant l’arrivada ha el stuì laschar rumper giu, la finala han Pozzovivo ed il Svizzer Mathias Frank pers 2 minutas e 40 secundas sin Spilak.

Spilak cun bunas cartas

En il classament general è Simon Spilak avant las duas etappas a Schaffusa uss 52 secundas avant il Talian Damiano Caruso. Terz cun in retard da pauc sur ina minuta è Steven Kruijswijk dals Pajais Bass. Mathias Frank è 2:51 minutas enavos sin plazza 6.

RR novitads 18:00