Siglir tar il cuntegn
Inhalt

Naziunal/Internaziunal Gran Risa: La pista per Marcel Hirscher

Cun in grond avantatg da temp tar il segund plaz ha Marcel Hirscher gudagnà ina giada dapli il slalom gigant sin la pista Gran Risa. Il Svizzer Justin Murisier cuntanscha cun il quart plaz il meglier resultat da sia carriera en questa disciplina.

Marcel Hirscher celebrescha la victoria.
Legenda: Marcel Hirscher – il retg dad Alta Badia. Keystone

Cun in grond avantatg dad 1,7 secundas ha Marcel Hirscher battì il Norvegiais Henrik Kristoffersen ad Alta Badia. Terz vegn il sloven Zan Kranjec e cuntanscha uschia per l'emprima giada en sia carriera ina plazza da podest en la cuppa mundiala.

Declassà la concurrenza en il segund percurs

En l'emprim percurs aveva Hirscher mo ina avantatg da 17 tschientavels. Pir en il segund percurs ha'l distanzià la concurrenza. Cun il slalom gigant sin la pista Gran Risa gudogna il skiunz austriac sia terza en la sessiun. Era tar il gigant a Beaver Creek ed il slalom en la Val d'Isère aveva el dominà. Quai malgrà ch'el aveva l'avust rut ses oss radund.

Buna rangaziun per Murisier

Sco tar il super-g da la dumengia da las dunnas occupa er tar il slalom gigant da la dumengia dals umens l'emprim Svizzer il quart plaz. Numnadamain ha Justin Murisier fatg in pass enavant en il segund percurs – dal tschintgavel sin il quart plaz. Per in plaz sin il podest han mancà Svizzer 25 tschientavels.

Puncts hai era dà per ils Svizzers Loïc Meillard sco 18avel, Gino Caviezel sco 20avel e Luca Erni sco 21avel.

RR novitads 15:00