Victoria dubla tar umens e dunnas
Tar la cursa da turas cun skis da las dunnas han Caroline Ulrich e Thibe Deseyn procurà per ina victoria dubla svizra. Ulrich, che ha 17 onns, è stada il di avant la purtadra da la bandiera per la delegaziun svizra durant la festa d'avertura. Ella ha pudì distanziar sia cumpatriota Deseyn (16 onns) per passa ina minuta. La Franzosa Margot Ravinel, ch'è ida per bronz ha pers prest duas minutas sin la victura.
Er tar ils umens èn aur ed argient ids a la Svizra. Il giuven da 17 onns, Thomas Bussard è sa mess tras cun 1:26 minutas avantatg sin ses schumellin Robin. SRF ha purtretà ils dus schumellins:
Aur e bronz en il super-G
Per in'ulteriura medaglia d'aur ha procurà Amélie Klopfenstein. La giuvna da 17 onns dal Giura Bernais ha gudagnà il super-G cun pitschens avantatgs cunter sias concurrentas da la Frantscha (+0,08) e l'Israel (+0.09). Sia istorgia è gia prest ina paraula: Ella fiss stada previsa be sco skiunza da reserva. Entras la blessura d'ina atleta è Klopfenstein lura vegnida a la partenza e quai malgrà ch'ella era il di avant anc malsauna.
Tar ils umens è Luc Roduit ì per la Svizra per ina medaglia da bronz. Il giuven da 17 onns ha pers 0,2 secundas sin il meglier temp dal Svedais Adam Hofstedt.
RTR novitads 16:00