Siglir tar il cuntegn
Inhalt

Naziunal/Internaziunal Gasparin banduna ils top10

Tar las cursas dal venderdi e da la sonda Le Grand-Bornand era l'Engiadinaisa Selina Gaparin sa rangada en ils top 10. La dumengia ha la biatleta dentant stuì sa cuntentar cun il 19avel plaz.

Selina Gasparin.
Legenda: Tar la cursa da start da massa na vegn Selina Gasparin betg pli en ils top 10. Keystone

Il venderdi era Selina Gasparin vegnida sisavla tar il sprint a Le Grand-Bornand en Frontscha. E tar la cursa da persecuziun aveva la biatlonista grischuna perfin anc fatg dus sigls enavant sin il quart plaz. La dumengia n'ha l'Engiadinaisa dentant betg fatg il sigl sin il podest, mabain dada or dals top 10. La biatlonista è tar la cursa da partenza da massa sur 12,5 kilometers sa rangada sin il 19avel plaz.

Ils Franzos nizzegian l'avantatg dal lieu

La Franzosa Justine Braisaz ha nizzegià ses avantatg dal lieu ed ha gudagnà l'emprima cursa en sia carriera. Ella ha battì la Bielorussa Irina Krujko e la Germana Laura Dahlmeier.

Er tar ils umens ha in Franzos dominà la cursa da la cuppa mundiala a Le Grand-Bornand. Per Martin Fourcard n'è la victoria dentant betg ina premiera. Il biatlonist franzos survegn sia 65avla medaglia d'aur. Il Svizzer Benjamin Weger suonda sin il tschintgavel plaz ed è uschia per la terza giada en questa sessiun en ils top diesch. Manchentà il podest ha Weger pervia dal sajettar.

RR novitads 16:00