Siglir tar il cuntegn
Inhalt

Naziunal/Internaziunal Funcziunari da FIFA confessa

Il funcziunari da la FIFA ed anteriur president da l’associaziun da ballape sidamericana COMNEBOL, Eugenio Figueredo, ha confessà d'avair prendì daners da corrupziun.

Eugenio Figueredo (mez) arriva a la dretgira a Montevideo, ils 24 da december 2015.
Legenda: Eugenio Figueredo (mez) arriva a la dretgira a Montevideo, ils 24 da december 2015. Keystone

Il procuratur public responsabel, Juan Gomez, ha ditg che Figueredo haja confermà ch'i dettia ina gronda rait da corrupziun en l'America dal Sid. Figueredo (83) haja concedì d’avair survegnì grondas summas da daners. Ultra da quai hajan 10 auters presidents da federaziuns da ballape sidamericanas prendì encunter daners da corrupziun, tranter auter per il commerzi cun dretgs d'emetter en la televisun.

La sonda è Figueredo vegnì ospitalisà pervi da problems cun il cor, ha confermà sia advocata. Figueredo era vegnì extradì quest’emna or da la Svizra. Ina derschadra ha decis da metter el en praschun pervi da corrupziun e lavada da daners suspectus.

Arrest a Turitg, praschun a Montevideo

La gievgia saira era Figueredo arrivà en la chapitala Montevideo en l'Uruguai. Là è el vegnì mess en la praschun centrala. Er ils Stadis Unids da l'America avevan pretendì si’extradiziun pervi da rinfatschas da corrupziun.

Il matg passà era Figueredo vegnì arrestà a Turitg. La Svizra ha extradì il funcziunari ad Uruguai e betg als Stadis Unids, perquai ch’i dat dapli enquistas cunter el en il stadi sidamerican.

RR novitads 6:00