Siglir tar il cuntegn
Inhalt

Naziunal/Internaziunal Froome ha dopà

A la Vuelta da quest onn è Chris Froome vegnì testà positiv sin la substanza «salbutamol». Quai ha rapportà l'Uniun da ciclissem internaziunala (UCI). La substanza vegn duvrada per tractar asma.

Purtret da Chris Froome sin velo.
Legenda: Chris Froome ha prendì memia bler d'ina substanza ch'el dovra per ses asma. Keystone

Chris Froome è vegnì testà positiv sin la substanza «salbutamol» che vegn duvrada per tractar asma. Quai ha annunzià l'Uniun da ciclissem internaziunala (UCI). I saja enconuschent che Froome pateschia dad asma, el enconuschia fitg exact las reglas, ha scrit Froome en ina communicaziun da ses team Sky. La substanza saja lubida da la WADA, l'agentura mundiala cunter doping, enfin tar 1'600 microgramms en in temp da 24 uras, uschia ils responsabels da Sky en la communicaziun.

Durant la Vuelta è ses asma vegnì mender

L'UCI haja infurmà Froome ch'el haja gì, en ina mesiraziun d'urin da la 18avla etappa ina valur memi'auta da la substanza. Lubì è tenor la WADA ina valur da 1'000 nanogramms per milliliter. Tar Froome hajan ins gì ina valur prest dubel uschè auta. La singularitad muntia dentant betg che Froome haja rut las reglas, scriva Sky.

Damai che ses asma saja vegnì mender en il decurs da la Vuelta, haja el auzà la dosa sin cussegliaziun dal medi. Sco adina haja el dentant guardà fitg precis da betg surpassas la dosa lubida, di Froome.

Scrit istorgia cun sia victoria dubla

Il 2017 ha Froome scrit istorgia cun la victoria dubla da la Tour de France e la Vuelta. Las duas victorias en Frantscha ed en Spagna en il medem onn han be anc dus auters dumagnà avant el. Il franzos Jacques Anquetil (1963) e Bernhard Hinault (1978).

RR novitads 09:00