Cunquai ch’il leader dal Tour de France na vegn tradiziunalmain betg attatgà sin l’ultima etappa che maina a Paris, po Chris Froome gia ussa sa legrar da la victoria dal Tour 2015. Per il ciclist brit da 30 onns è quai gia la segunda giada ch’el gudogna il Tour de France suenter il 2013. Froome gudogna era la classificaziun sco meglier ciclist en ils culms – l’uschenumnà premi da muntogna.
Quintana senza success
Ch’el dastga festivar dentant damaun sia segunda victoria dal Tour de France, n’era avant ed era lung temps durant questa ultima etappa dad oz betg segir. Il segund dal classament general, il Columbian Nairo Quintana ha numnadamain procurà per in zichel tensiun durant questa 20avla etappa dal Tour de France. Sin l’ultim traject da 110,5 km sin l’Alp d’Huez ha el attatga pliras giadas il leader Chris Froome, senza dentant vegnir davent dad el.
Pir 8,9 km avant l’arrivada èsi grategià a Quintana da scappar da Froome. Il Columbian è vegnì la fin finala 1:20 minutas avant Froome sco segund en l’arrivada – memia pauc per gudagnar il Tour da France.
Thibaut Pinot è stà il spert
Gudagnà l’etappa da prestige dad oz ha il Franzos Thibaut Pinot. Pinot ha attatgà gia baud e la finala cuntanschì l'Alp d'Huez 18 secundas avant Nairo Quintana e 41 secunda avant il Canadais Ryder Hesjedal.
Il leader Chris Froome ha cuntanschì l'arrivada sco 5avel ensemen cun Alejandro Valverde cun in retard dad 1:38 sin Thibaut.
Frank terminescha sco 8avel
Ina buna prestaziun ha è il svizzer Mathias Frank mussà. El ha cuntanschì l'arrivada sco 23avel cun in retard da 4 minutas e 38 secundas ed uschia defendì in plaz en ils top ten dal classament general.
Avant la davosa etappa da damaun maina Chris Froome il classament general cun ina minuta e 12 secundas avant il Columbian Nairo Quintana. Terz è il spagnol Alejandro Valverde cun in retard da 5 minutas e 25 secundas. Mathias Frank ha spers in plaz en il classament general e terminescha il Tour de France sco 8avel cun in retard da bun in quart'ura sin Chris Froome, per il ciclist svizzer in grondius success.