Siglir tar il cuntegn
Inhalt

Naziunal/Internaziunal French Open: Wawrinka cumenza cunter in qualificant

Stan Wawrinka dat ses emprim gieu al Grand Slam da tennis a Paris, il French Open, encunter in qualificant. Tar in duel cun in dals dus top-favurits Rafael Nadal e Novak Djokovic vegnissi pir en il final.

Stan Wawrinka al French Open
Legenda: Il 2015 ha Stan Wawrinka battì en il final dal French Open il serb Novak Djokovic. Keystone

Stan Wawrinka na sa chatta betg en il tableau cun il retg sin sablun, il Spagnol Rafael Nadal, ed il defensur dal titel, il Serb Novak Djokovic. Uschia èn quels dus giugaders ina gia ord via sin via en il final. Wawrinka po uschia esser cuntent co i è vegnì tratg la sort a Roland Garros.

Murray adversari pussibel en il mezfinal

Cuntanscha Stan Wawrinka il quartfinal a Paris pudessi vegnir là tar in duel cun il Croat Marin Cilic. En il mezfinal spetgass lura tenor palpiri il Sco Andy Murray u il Giapunais Kei Nishikori.

Stan Wawrinka, il victur dal French Open 2015, è il sulet giugader svizzer a Paris. Marco Chiudinelli e Henri Laaksonen èn vegnids franads gia en la qualificaziun e Roger Federer desista sin il French Open 2017.

Nadal e Djokovic sut squitsch

Rafael Nadal lantscha la chatscha sin ses 10avel triumf a Roland Garros encunter il Franzos Benoit Paire. En il mezfinal pudessi vegni tar in duel cun il defensur dal titel Novak Djokovic. Il Serb, che dat ses emprim turnier cun Andre Agassi sco trenader, dat ses emprim gieu encunter il Spagnol Marcel Granollers.

Timea Bacsinszky encunter ina Spagnola

La giugadra svizra Timea Bacsinszky dat il gieu d’emprima runda al French Open encunter la Spagnola Sara Sorribes Tormo. Quest duel hai dà be ina giada. L’onn passà a Gstaat aveva la Svizra gudagnà en dus sets.

Bacsinszky è la gronda speranza svizra tar las dunnas. Il 2015 era la giugadra dal chantun Vad vegnida fin en il mezfinal.

Viktorija Golubic cumenza il turnier encunter Aljaksandra Sasnovitsch. Encunter la giugadra da la Bielorussia ha Golubic pers ils davos dus duels, ina giada en la Cuppa Fed e lura al turnier da tennis a Bienna.

Kvitova festivescha in comeback

Surprendentamain festivescha Petra Kvitova in comeback al French Open a Paris. La Tscheca era vegnida attatgada d’in lader cun in cuntè en sia abitaziun il december da l’onn passà. Kvitova era vegnida blessada grev vid in maun ed aveva stuì vegnì operada sur pliras uras. Ussa dat ella ses comeback encunter l’Americana Julia Boserup. Petra Kvitova ha tranter auter gudagnà en sia carriera duas giadas il turnier da Grand Slam a Wimbledon.