Siglir tar il cuntegn
Inhalt

Naziunal/Internaziunal FIFA avra procedura cunter Xhaka e Shaqiri

La moda co Granit Xhaka e Xherdan Shaqiri han celebrà lur gols cunter la Serbia en il segund gieu da gruppa als campiunadis mundials da ballape en Russia ha ussa consequenzas. La FIFA vul ussa sclerir sch'il gest è stà motivà politicamain.

Il giugader da ballape Xherdan Shaqiri
Legenda: Xherdan Shaqiri mussa il gest dispitaivel, l'evla dubla. Reuters

L’intermezzo da Granit Xhaka e Xherdan Shaqiri suenter ils dus gols cunter la Serbia pudess avair consequenzas giuridicas. Tgeninas n’è però anc betg cler. Segir è dentant che quel gest ha procurà per malruaus enturn l’equipa svizra.

Sustegn da la Federaziun svizra

La Federaziun svizra da ballape stat cumplettamain davos l’equipa. El na crai betg ch’ils dus giugaders cun ragischs cosovaras albanaisas vegnan serrads, uschia Alex Miescher, il secretari general dal SFV. Ch’il capitani Stephan Lichtsteiner haja, suenter il gieu, medemamain mussà l’evla dubla, mussia ch’els sajan in’equipa solidarica. Per Miescher hajan ils giugaders sa cumportà uschia or da pura euforia. I saja stà in gieu plain emoziuns. I na saja betg stà in signal politic.

En visier ha la FIFA era la Federaziun da ballape da la Serbia. La raschun è ch’intgins fans serbs èn sa cumportads mal en il stadion.

I saja difficil da dir, sco u sche la FIFA dettian in chasti a Granit Xhaka e Xherdan Shaqiri. Quai en connex cun la sco ils dus ballapedists han celebrà lur gols cunter la Serbia. Da quest avis è il president da l’Associaziun svizra da ballape, Peter Gillieron. Dentan fissi sco in culp da martè sch’els vegnissan serrads. Xhaka e Shaqiri avevan suenter lur gols mussà l’evla cun dus chaus. La Fifa ha en consequenza avert ina procedura cunter il duo. La sentenzia vegn spetgada fin glindesdi.

RR novitads 06:00