Siglir tar il cuntegn
Inhalt

Festa da lutga federala 2016 Tensiun totala en il cumbat da las generaziuns

La festa da lutga federala ad Estavayer empermetta in crimi al segund di da festa. Gist 25 lutgaders èn sin ils chaltgogns in a l’auter en il cumbat per il titel da retg da lutga, tranter quels er ils gronds favurits.

Matthias Sempach ed Armon Orlik
Legenda: Matthias Sempach ha bittà Armon Orlik en il resgim. mad

6 lutgaders, tranter auter il Grischun Beat Clopath ed il Bernais Christian Stucki, èn a la testa dal classament intermediar suenter 4 lutgas, quai cun 38,75 da maximal 40 puncts. L’avantatg sin la concurrenza munta dentant be 0,5 puncts. 25 lutgaders èn classads entaifer 0,5 puncts, er Armon Orlik da Maiavilla ed il retg actual, il Bernais Matthias Sempach.

Ils fans pon sa legrar sin ina dumengia plain tensiun en il chantun Friburg. Igl è tut avert en il cumbat per il titel.

Sempach ed Orlik in sper l’auter

Procurà per ina tensiun totala al segund di da festa ha oravant tut Matthias Sempach. Il retg dal 2013 ha mess en dies Armon Orlik en la quarta lutga ed uschia franà il giuven lutgader da 21 onn ch’era sin via da scappar da la concurrenza. Il duo Sempach ed Orlik che tutgan tranter ils cunfavurits han exact tuttina blers puncts suenter 4 dad 8 lutgas.

Duel giuven encunter vegl

Speranzas dastgan er avair dus ulteriurs lutgaders giuvens, numnadamain Remo Käser (19 onns) e Samuel Giger (18 onns). Dentant er ils pli rutinads èn anc da la partida en il cumbat per il titel, rutinads sco Christian Stucki u Bruno Gisler.