Siglir tar il cuntegn
Inhalt

Festa da lutga federala 2016 Ina festa superlativa ad Estavayer-le-Lac

Ils gieus olimpics da stad a Rio èn istorgia. Dentant gia questa fin d’emna stat cun la festa da lutga federala ad Estavayer-le-Lac il proxim punct culminant sin il program.

Arenal da la festa da lutga federala ad Estavayer.
Legenda: Enturn las set plazzas da resgim han plaz en l’arena bun 52’000 persunas. Keystone

Per l’emprima gia dapi il 1958 vegn la festa da lutga federala organisada en il chantun Friburg. La 44avla ediziun da quest eveniment è ad Estavayer-le-Lac ed è ina gia dapli ina festa da la superlativa. Tut en tut èn 800 atlets en acziuns: 280 lutgaders, 120 che bittan il crap e 400 mazzacullas (Hornusser).

Il budget per quest mega event munta a radund 29 milliuns francs. Ils organisaturs spetgan durant la fin d’emna bun 250’000 visitaders sin l’areal da festa da 90 hectaras. En l’arena han plaz 52’016 persunas.

70’000 uras da lavur

Il comité d’organisaziun sa cumpona da 200 commembers. Radund 4’000 gidantras e gidanters procuran che tut saja pront sin l’areal da festa ed en il stadion. Tut en tut dat quai passa 70’000 uras lavur. Tranter auter èsi da transportar en l’arena 900 tonnas resgim per las 7 plazzas da lutga.

Viadi cun il traffic public

Per surmuntar las fullas da visitaders giavischa il comité d’organisaziun che blers arrivan ad Estavayer-le-Lac cun il traffic public. I cursescha en l’entira Svizra trens e bus be per la festa da lutga federala.

Per star sur notg stat a disposiziun en la vischinanza in campadi da festa che dat plaz a bun 20’000 persunas.

Ulteriuras cifras tar la festa da lutga federala

Biera 200'000 liters
Aua minerala100'000 liters
Café60'000
Vinars4'000 liters
Vin20'000 buttiglias
Suc da maila
30'000 liters
Charn20'000 kilos
Liongias40'000
Pastizarias100'000
Tualettas1'843

RR actualitad e sportissimo