Siglir tar il cuntegn
cuntegn

Naziunal/Internaziunal Federer scriva istorgia a Wimbledon

Incredibel - Roger Federer gudogna per l'otgavla giada a Wimbledon. Grazia a questa victoria è Federer il victur da record a Wimbledon.

Roger Federer triumfescha.
Legenda: Roger Federer triumfescha per l'otgavla giada a Wimbledon. Keystone

Roger Federer ha gudagnà per l’otgavla giada il turnier da Grand Slam a Wimbledon. En il final ha il Svizzer battì il Croat Marin Cilic cleramain en trais set cun 6:3, 6:1 e 6:4. Grazia a questa victoria è Federer il victur da record a Wimbledon – er è Federer il pli vegl victur dal turnier. Ultra da quai èsi gia ses 19avel titel da Grand Slam en sia carriera.

A partir da l’autr’emna è Federer il numer 3 dal mund. Quai davos il Scot Andy Murray ed il Spagnol Rafael Nadal.

Nizzegià la gronda schanza

Roger Federer ha nizzegià la gronda schanza da daventar sulet victur da record a Wimbledon.

Giugadra da tennis svizra cun pocal.
Legenda: Martina Hingis gudogna il mixed ensemen cun Jamie Murray. Keystone

Era Martina Hingis triumfescha

Ensemen cun il Brit Jamie Murray ha Hingis gudagnà la concurrenza maschadada, il mixed. En il final ha il duo battì Henri Kontinen e Heather Watson en dus sets cun 6:4 e 6:4. Per Hingis è quai il 23avel titel da Grand Slam da sia carriera: 5 giadas ha ella gudagnà en la concurrenza singula, 12 giadas en il dubel e 6 giadas en il mixed.

RR sportissimo 17:00