Mo 4 da 23: quai èn las cifras, ch’han fatg la differenza tranter Roger Federer e Novak Djokovic en il final da l’US Open. Tut en tut ha il Svizzer gì 23 schanzas da far in break cunter il Serb. Nizzegià ha el dentant be 4 da quellas. Djokovic è perencunter stà pli effectivs ed ha nizzegià 5 da las 12 pussaivladads da far in break cunter Federer.
Djokovic ha mussà en l’entira partida cunzunt lura ses meglier tennis, cura ch’igl ha fatg da basegn. Uschia per exempel en il terz set cura che Federer manava cun 3:4. En stil d’in champiun ha el pudì parar las duas pussaivladads da Federer da far in break.
L’auter onn puspè
A la fin da la partida ha Federer la fin finala mo fatg dus puncts pli pauc che Djokovic (145:147). Federer è bain stà trumpà da sia terrada: «Dentant jau hai giugà in fitg bun turnier. L’entir viadi en l’America dal nord è stada excellenta», uschia Federer. El saja cuntent co el dettia tennis e charezzia anc adina quest gieu. «Jau empermet a vus, jau vegn a turnar l’onn proxim», uschia Federer ch’ha gia gudagnà 5 giadas l’US Open.
10avel titel da Grand-Slam per Djokokvic
Fertant che Federer ha manchentà a New York ses 18avel titel da Grand-Slam, po Djokovic festivar cun sia victoria a l’US Open gia ses 10avel titel da Grand-Slam. Per il numer in dal mund è quai suenter il 2011 gia la segunda giada ch’el gudogna l’US Open.
RR novitads 06:00