Siglir tar il cuntegn

Naziunal/Internaziunal Federer è puspè il numer 1

Cun ina victoria cunter Robin Haase è Federer puspè anavos sin il tron dal tennis. El ha gudagnà il quartfinal a Rotterdamm cunter Robin Haase en trais sets. Quai cun 4:6, 6:1 e 6:1. Sia concurrenza è impressiunada.

Anc mai è in quartfinal stà uschè fitg en il focus sco quest gieu tranter Federer e Haase. Cun la victoria ha Federer rimnà avunda puncts per turnar a la testa da la glista da rangaziun mundiala ATP, davent da glindesdi maina el quella. Cun 36 onns e mez è el il pli vegl numer 1 insumma. Andre Agassi ch'è stà l'onn 2003 la davosa giada a la testa era trais onns pli giuven che Federer uss. L'emprima giada è Federer stà il numer 1 avant 14 onns.

Ses concurrents admiran el

Tar tut ils concurrents da Federer è l'admiraziun gronda. David Goffin sco era Grigor Dimitrov èn fascinads da Federer.

En il gieu ha el gia adina savì tut. Mai fa surstar co el vegn da mantegnair ses livel corporal uschè aut.
Autur: David Goffin

Tant Goffin sco era Dimitrov stattan sezs en ils quartfinals a Rotterdam, tuttina guardan er els in zic sin la preschentaziun da lur anteriur idol.

El ha gia cuntanschì uschè bler. Mai na faschess betg surstar sch'el dumogna er quai.
Autur: Grigor Dimitrov

Er Stan Wawrinka è stà da la partida a Rotterdam. El è dentant crudà or surprendentamain gia en l'emprima runda.

Roger è il meglier giugader da l'istorgia. Igl è adina insatge spezial da guardar co el gudogna titels.
Autur: Stan Wawrinka

Ses terz titel a Rotterdam na po Federer anc betg gudagnar il venderdi saira. E tuttina ha quest gieu survegnì almain tanta attenziun sco in grond final.

RR novitads 21:00