René Fasel na vegn il 2020 suenter sis temps d'uffizi betg pli a candidar per il presidi da la Federaziun internaziunala da hockey IIHF. Quai ha el confermà envers l’agentura da novitads russa TASS. El saja lura 70 e per el saja quai il dretg mument per smetter, uschia Fasel.
Il dentist da 68 onns da Friburg maina la Federaziun internaziunala da hockey dapi il 1994. Tgi che daventa il successur da Fasel vegn decis probablamain durant il campiunadi mundial da hockey il 2020 en Svizra.
Sin quel termin pudess Fasel er terminar sia commembranza en il Comité olimpic internaziunal IOC. Quella instituziun enconuscha en princip ina limita da vegliadetgna da 70 onns. Fasel represchenta actualmain ensemen cun Denis Oswald las colurs svizras en l'IOC.
RR novitads 14:00