Siglir tar il cuntegn

Header

Navigaziun

Giugaders dal FC Sion vid celebrar la victoria.
Legenda: Ils giugaders da Sion fan vinavant ina buna figura en l'Europa League. Keystone
cuntegn

Naziunal/Internaziunal FC Sion top – FCB flop

Il FC Sion è sin buna via da cuntanscher la fasa da K.o. en l’Europa League. Ils Vallesans han gudagnà ordaifer encunter Bordeaux cun 1:0 ed uschia surpiglia la testa da la tabella.

Malgrà che Sion spetga gia dapi in mais sin ina victoria en la Super League fa il club svizzer ina buna figura sin plaun internaziunal. Procurà per il gol decisiv encunter Girondins Bordeaux ha il defensur Léo Lacroix en la 21avla minuta. Ils Franzos han silsuenter dominà il gieu, n’èn dentant strusch vegnids tar schanzas da gol.

Suenter trais da sis gieus da gruppa maina Sion la tabella cun 7 puncts, 4 puncts avant Liverpool ch’ha stuì sa cuntentar a chasa cun in pari dad 1:1 encunter Rubin Kasan. Sin Bordeaux e Kasan ha Sion gia in avantatg da 5 puncts.

Trumpada per Basilea

Il FC Basilea ha en il terz gieu da l’Europa League per l’emprima giada pers in gieu. Encunter il club portugais Belenenses Lissabon ha il FCB per surprendentamain en il St. Jakob-Park cun 1:2.

Cumenzà ha il gieu bain per Basilea. Gia en la 15avla minuta ha Michael Lang manà il campiun svizzer cun 1:0 en avantatg. Leal cun in sajet ord gronda stanza en la 27avla minuta e Kuca suenter entras in conter paucas secundas avant la pausa èn vegnids da volver il gieu. En la segunda mesadad n’ha Basilea betg pli pudì curreger il resultat.

Damai che l’AC Fiorentina ha pers a chasa encunter Lech Posen cun 1:2 resta il FC Basilea a la testa da la tabella, dus puncts avant Lech Posen e Belenenses.

RR novitads 06.00