Siglir tar il cuntegn
Inhalt

Naziunal/Internaziunal Favre nov trenader da Borussia Dortmund

Il svizzer Lucien Favre è il nov trenader da Borussia Dortmund, in dals pli populars clubs da la Germania. Favre banduna il club franzos OGC Nice ed ha suttascrit in contract fin il 2020.

Lucien Favre, il nov trenader da Borussia Dortmund.
Legenda: Lucien Favre, il nov trenader da Borussia Dortmund. Keystone

Per Lucien Favre è ses nov engaschi a Dortmund in return en Germania ed en la Bundesliga. Suenter ils dus titels da campiun svizzer cun il Club da ballapè da Turitg ils onns 2006 e 2007, ha Favre trenà l'emprim Hertha Berlin e lura Borussia Mönchengladbach. Ils davos dus onns ha Favre trenà en Frantscha il OGC Nice.

Favre duai purtar la veglia gloria

Uss turna il trenader da 60 onns en Germania e surpiglia il club da cult Borussia Dortmund ch'ha gì ina stagiun problematica. Suenter la relaschada dal trenader ollandais Peter Bosz, n'ha era ses successur, l'austriac Peter Stöger, betg gì il success giavischà. Dortmund ha terminà la stagiun cun in retard da 29 puncts sin il vegl e nov campiun Bayern München.

Almain è Dortmund sa qualifitgà per la Champions League. Quai dentant mo piz a cup – grazia ad ina meglra differenza da gols ch'il concurrent direct Bayer Leverkusen. Uss duai Lucien Favre procurar per novs impuls e manar Dortmund a veglia gloria.

RR novitads 12:00