Siglir tar il cuntegn
Inhalt

Naziunal/Internaziunal Far la valisch – Svizra perda cun 4:5 cunter Tschechia

La terrada cunter la Tschechia munta per la Svizra la fin al champiunadi mundial da hockey sin glatsch. En il gieu decisiv cunter il capogruppa ha la Svizra pers cun 4:5.

Ils giugaders svizzers bandunan il glatsch
Legenda: Ils giugaders da l'equipa naziunala svizra bandunan per la davosa giada il glatsch al champiunadi mundial. Keystone

Cumbattì han ils giugaders svizzers fin la davosa minuta, vid la veglia n’ha igl betg mancà. Era suenter il 2:5 per la Tschechia, han ils Svizzers anc empruvà tut il pussibel ed han grazia als gols da Noah Schneeberger e Sven Andrighetto anc pudì scursanì sin 4:5. Uschia ha igl anc dà in pau tensiun a la fin, per dapli n’hai dentant betg tanschì.

Nus avain simplamain fatg l’entir turnier ils medems sbagls.
Autur: Patrick Fischertrenader da l’equipa naziunala svizra

Ils giugaders hajan survegnì memia blers chastis. Quai na possia betg vertir sin quest nivel, manegia era il defensur Raphael Diaz.

Uschia finescha l’equipa naziunala Svizra il champiunadi mundial en Russia sin plazza 5 ni 6. Igl na tanscha betg per la qualificaziun per ils quart-finals, quai ch’ils trenaders vevan formulà sco finamira.

Per far il pass sin plaz 4 ed uschia sa qualifitgar per ils quart-finals, vess la Svizra stuì batter la Tschechia en il temp regular. Pers ils impurtants puncts ha la Svizra en ils emprims gieus, nua ch’ils Svizzers han pers cunter ils pli flaivels adversaris da la gruppa, cunter il Kasachstan e la Norvegia.