Siglir tar il cuntegn
Inhalt

Naziunal/Internaziunal Fa Federer ord 9’994 gia oz 10’000?

Gia en l’emprim gieu al grand slam da tennis a Wimbledon ha Roger Federer la schanza da cuntanscher in’ulteriura marca impressiunanta. Suenter ses gieu d’emprima runda encunter Alexandr Dolgopolow pudess Federer avair sin ses conto 10’000 assas.

Roger Federer
Legenda: Roger Federer curt avant in ulteriura marca magica - 10'000 assas. Keystone

Enfin oz han sulet dus giugaders da tennis realisà dapli che 10’000 assas en la carriera. Quai èn il Croat Ivo Karlovic (12’018) sco er ses cumpatriot Goran Ivanisevic (10’131) ch’ha dentant gia terminà la carriera avant intgins onns. Sin il terz plaz suonda Roger Federer ch’ha il mument 9’994 assas sin ses conto. I mancan pia anc 6 assas enfin questa marca magica.

Avant bunamain 20 onns ha Roger Federer cumenzà cun sia «rimnada d’assas».

  • Emprima ass...

... ha Federer fatg en ses emprim gieu d’ATP il 1998 a Gstaad encunter Lucas Arnold Ker. Igl è dentant stà la suletta assa en quest gieu encunter l’Argentin, in gieu che Roger Federer ha la finala pers en dus sets.

  • La pli bleras assas...

... ha Federer fatg en il final da Wimbledon il 2009. En il crimi sur 5 sets encunter l’American Andy Roddick ha Federer laschà nudà 50 assas, insatge ch’il Svizzer n’ha dapi lura mai pli cuntanschì.

  • La davosa assa...

... ha Federer fatg dacurt en il final da Halle encunter il Tudestg Alexander Zverev. En tut ha el fatg en quest final 4 assas, en media 7,2 assas per gieu.

  • La proxima assa...

... vegn Roger Federer pli probabel a far il mardi, ils 4 da fanadur, en ses emprim gieu a Wimbledon encunter Alexandr Dolgopolov. En il davos duel cun l’Ucrain a l’Australian Open il 2016 veva Federer rimnà en trais sets 25 assas.

Intginas cifras davart il service da Roger Federer

Assas9994
Sbagls dubels2463
Emprim service en la plazza62%
Puncts gudagnads suenter 1. service77%
Puncts gudagnads suenter 2. service57%
Defendì ballas da break67%