Siglir tar il cuntegn
Inhalt

Naziunal/Internaziunal Everton empresta Tarashaj a Frankfurt

Shani Tarashaj mida enfin la fin da la stagiun dal club da la Premier League Everton tar il club da la Bundesliga Eintracht Frankfurt. Là duai el oravant tut survegnir dapli pratica da gieu.

Shani Tarashaj
Legenda: Il giugader naziunal Shani Tarashaj mira cun optimissem vers Frankfurt. Keystone

Il giugader da 21 onns era vegnì engaschà d’Everton durant la pausa d’enviern fin il 2020, dentant gist vegnì emprestà vinavant als Grasshoppers. La preparaziun sin la nova stagiun 2016/2017 ha Tarashaj perencunter absolvì cumplettamain cun Everton. Cun il club englais ha Shani Tarashaj dentant astgà giugar be en ils emprims dus gieus da test la fin fanadur.

Sut il trenader Ronald Koeman, il nov trenader da Everton e successur da Roberto Martinez, èn las perspectivas dal giugader naziunal stadas senza gronda speranza. Perquai preferescha Tarashaj d’absolver questa stagiun a Frankfurt sco collega d’equipa da Haris Seferovic.

Il nov contract ha Shani Tarashaj sco i para suttascrit a l’ur dal camp da trenament cun la naziunala Svizra a Feusisberg.

Gökhan Inler
Legenda: Gökhan Inler banduna il campiun englais Leicester City. EQ Images

Dad in campiun a l’auter

Er Gökhan Inler ha chattà ina nova destinaziun da ballape nua ch’el spera da pudair giugà dapli. L’anteriur capitani da la naziunala Svizra mida dal campiun englais Leicester City tar il campiun tirc Besiktas Istanbul.

La stagiun passada è Gökhan Inler vegnì campiun en la Premier League cun il club Leicester City. Il Svizzer da 32 onns ha dentant giugà be 5 gieus cun il campiun da surpraisa. Tar il nov club Besiktas Istanbul ha Inler suttascrit in contract da 3 onns, uschia communitgescha BBC.

Son Gagl cloma Ajeti ord la Bundesliga

Il club da la Super League FC Son Gagl ha engaschà per questa stagiun il giugader Albian Ajeti. Il giugader d’amez da 19 onns ord la scola da talents dal FC Basilea è sut contract tar Augsburg fin il 2020.

Albian Ajeti
Legenda: Albian Ajeti turna per ina stagiun en Svizra tar il FC Son Gagl. Reuters

Augsburg empresta Albian Ajeti fin la fin da la stagiun. Ajeti, burgais dubel svizzer-albanais ha absolvì tut las scolas da juniors tar il FCB ed ha en 21 gieus er sajettà 6 gols cun l’emprima equipa da Basilea.

RR novitads 11:00