Siglir tar il cuntegn

Header

cuntegn

Naziunal/Internaziunal Er la Fifa accepta il Cosovo

Suenter l'UEFA ha er la Fifa prendì si il Cosovo sco nov commember. Quai ensemen cun il Gibraltar. Er survegn la Fifa l'emprima secretaria generala.

Ils delegads dal congress da la Fifa a Mexico-City han prendì si il Cosovo ed il Gibraltar sco 210 respectivamain 211avel commember. Avant bunamain duas emnas aveva gia l’UEFA acceptà il Cosovo piz a cup sco nov commember.

Cunzunt la Serbia sa dosta cunter la decisiun da la Fifa e da l’Uefa, perquai che la Serbia na renconuscha betg il Cosovo. L’associaziun serba ha annunzià da purtar plant cunter questa decisiun.

Grazia a la decisiun da la Fifa pudessan il Cosovo ed il Gibraltar schizunt anc avair il dretg da giugar la qualificaziun per il proxim campiunadi mundial 2018 en Russia.

Emprima secretaria generala

Ultra da quai ha la Fifa elegì Fatma Samoura dal Senegal sco nova secretaria generala. Quai ha il president da la FIFA Gianni Infantino confermà al congress da la federaziun a Mexico-City. Samoura ha lavurà ils davos 20 onns en differentas funcziuns tar las Naziuns Unidas. Ella è uschia l'emprima dunna che surpiglia questa funcziun entaifer la Federaziun internaziunala da ballape.

RR novitads 08:00

Artitgels legids il pli savens