Siglir tar il cuntegn
Inhalt

Naziunal/Internaziunal Emprima victoria en la cuppa mundiala per Matts Olsson

Il Svedais ha gudagnà il slalom gigant parallel dad Alta Badia. Il meglier Svizzer è stà Justin Murisier sin plaz 7.

Dus skiunzs as gratuleschan cun ina branclada a l’arrivada.
Legenda: Olsson (a dretga) ha battì Kristoffersen en il final dad Alta Badia. Keystone

Segund è vegnì il Norvegiais Henrik Kristoffersen e terz l’Austriac Marcel Hirscher. Ils Scandinavs èn stads ils gronds stars tar la cursa dad Alta Badia. Tschintg Svedais ed in Norvegiais èn vegnids en ils top 6.

Emprima victoria

En il final ha Kristoffersen durmì in zic al start ed uschia è Olsson arrivà cun in avantatg da trais tschientavels a l’arrivada. El po festegiar sia emprima victoria en la cuppa mundiala. La stagiun passada aveva el cuntanschì per l’emprima giada in plaz sin il podest en ils slaloms gigants da Kranjka Gora e Garmisch.

Rangaziun dals Svizzers

Il 7avel plaz da Justin Murisier è stà il meglier resultat per ils Svizzers. Per Loïc Meillard èsi stà a fin suenter l’otgavelfinal, per il Grischun Gino Caviezel ed il Bernais Luca Aerni percunter gia suenter l’emprima runda.

RR novitads 20:00