En il stadion da Roland Garros n'ha Stan Wawrinka nagina schanza, da gudagnar in ulteriur titel da Grand Slam en il final dal French Open.
Pressiun sur 2 uras e 5 minutas
La dumengia suentermezdi a Paris n'haja betg dat blers muments, en ils quals che Stan Wawrinka era bun da tegnair cunter als «monster Nadal» (tun original da Stan Wawrinka). En cuntrari: Il mallorquin ha fatg duas uras e tschintg minutas pressiun cunter il svizzer.
Nadal ha realisà la «Décima»
Wawrinka, il victur dal French Open 2015, era savens en la defensiva. Fertant ch'il vadais ha stuì ir senza titel or da ses quart final da Grand Slam, è Nadal arivà senza perder in set tar ses 15avel titel da major. Diesch da quels titels ha el gudagnà a Roland Garros.
Rafael Nadal: Deschavla victoria a Paris?
Rafael Nadal ed il French Open - quai è ina cumbinaziun extraordinaria. Nov giadas ha il retg dal tennis sin sablun gia gudagnà il turnier a Paris. En il final la dumengia suentermiezdi encunter Stan Wawrinka ha Nadal la schanza da gudagnar per la deschavla giada a Paris.
Stan Wawrinka: Quart gudogn en in final da Grand Slam?
Per Stan Wawrinka è il gieu cunter Nadal la sfida ultimativa. Tuttina ha Stan Wawrinka la spranza da pudair far il nunpussaivel. I dat numnadamain er ina statistica che pledescha per el. Trais giadas è Wawrinka stà en in final d'in Grand Slam, tuttas trais giadas ha el gudagnà.
RR Sportissimo 12:05++
