Suenter che Glen Hanlon veva abditgà il venderdi sco trenader naziunal aveva la Federaziun svizra da hockey sin glatsch spert fatg cler tgi che duai daventar successur dal trenader canadais: L’actual trenader dal EHC Bienna Kevin Schläpfer ch’ha dentant anc in contract fin il 2018 tar Bienna. Senza infurmar il club ha la federaziun fatg in’offerta a Schläpfer.
Ussa ha il cussegl d’administraziun dal EHC Bienna decidì unanimamain da betg laschar ir davent Kevin Schläpfer. Tar questa decisiun èsi vegnì, perquai che la federaziun ha gì en il focus Schläfer sco trenader naziunal er suenter che Bienna aveva gia refusà ina giada ina tala offerta.
Gronda critica a la federaziun
Il proceder da la Federaziun svizra da hockey sin glatsch ha vilentà fitg ils responsabels dal EHC Bienna. Els han crititgà massiv la federaziun. Per l'ina saja vegnì contractà davos dies e per l’autra na dettia nagina clausula da sortir en il contract da Schläpfer.
Schläpfer cun larmas en ils egls
Quant fitg che questa entira chaussa è ida a cor a Kevin Schläpfer han ins vesì a la conferenza da medias en la Bieler Arena. Schläpfer ha bragì duas giadas durant la conferenza ed ha stuì bandunar quella per intginas minutas. Il trenader da 45 onns ha er confermà, ch’el avess gugent ditg gea a la terza proposta da la federaziun da surpigliar la naziunala svizra da hockey sin glatsch per la fin da la stagiun.
RR novitads 16.00