Duel istoric tranter Federer e Wawrinka

In mez-final ad in turnier da Grand Slam tranter 2 giugaders svizzers, quai n’hai anc mai dà. Il duel da questa notg tranter Roger Federer e Stan Wawrinka è pia ina premiera.

Roger Federer e Stan Warinka durant in gieu il 2014.

Legenda da maletgs: Roger Federer e Stan Wawrinka en il mez-final da la ATP World Tour Finals a Londra il 2014. EQ Images

Uschiglio han ils 2 Svizzers dentant gia giugà bleras giadas in cunter l’auter. Dals 19 duels ha Federer gudagnà 16, Wawrinka sulet 3. Tar l’ultim inscunter è però Wawrinka ì giu dal plaz sco victur. El ha gudagnà a moda suverana il quart-final dal French Open a Paris.

«  Jau stoss dar mes meglier tennis per avair ina schanza. »

Stan Wawrinka

Federer spera uss sin revantscha per questa terrada. La cuvrida sperta a New York gida speranza el, ha Federer manegià. Ses adversari è conscient che Federer è actualmain en buna furma. Ma quai vala era per Wawrinka sez, ch’ha fin ussa persvadì a New York. El stoppia dentant dar ses meglier tennis per avair ina schanza, ha il Romand manegià.

Il gieu tranter Roger Federer e Stan Wawrinka è la notg da venderdi sin sonda enturn las 2:00 (temp svizzer).