Siglir tar il cuntegn
cuntegn

Naziunal/Internaziunal Defect fraina Nino Schurter a Soloturn

Triumf per Jolanda Neff e discletg per Nino Schurter. Il mountainbiker da Tersnaus n’ha per ina gia betg cuntanschì in plaz da podest. A la cursa dal Swiss Bike Cup a Soloturn ha Schurter stuì sa cuntentar cun il quart plaz.

Nino Schurter
Legenda: Il campiun olimpic e campiun mundial Nino Schurter. Keystone

Il campiun olimpic sa chattava en la gruppa da testa. En la quarta da sis rundas è Schurter lura vegnì franà d’in defect ed è uschia crudà enavos. Profità da quai ha la finala Lars Forster dal Team BMC ch'ha gudagnà la cursa, set secundas avant Mathias Flückiger e bun duas minutas avant Andri Frischknecht, il fegl dal pionier da mountainbike Thomas Frischknecht.

Anc dapli discletg che Nino Schurter ha il Franzos Julien Absalon gì. Il dubel campiun-olimpic ha pervia d'in defect stuì terminar la cursa gia suenter l'emprima runda.

Jolanda Neff sisum il podest

Tar las dunnas ha Jolanda Neff gudagnà, quai en il sprint final avant la campiunessa d'Europa da las U23 Sina Frei e Linda Indergand. Neff ha uschia mussà che sia furma constat duas emnas avant l'emprima cursa da la cuppa mundiala a Nove Mesto en Tschechia.

In plaz da podest hai er dà per Vital Albin en la categoria dals U23. Avant ses isch-chasa è Albin vegnì terz cun in retard da 26 secundas sin il victur, il Tessinais Filippo Colombo. Er ils ulteriurs Sursilvans han persvadì. Andrin Beeli da Sagogn è vegnì en questa categoria 5avel ed Ursin Spescha da Sevgein 11avel.

RR Sportissimo 12:00