Siglir tar il cuntegn

Header

cuntegn

Naziunal/Internaziunal Debuttants Yule ed Aerni cun pitschnas schanzas

En la davosa cursa al campiunadi mundial da skis a Vail/Beaver Creek partan ils skiunzs svizzers cun pitschnas schanzas sin ina medaglia. Tuttina vul il trio cun Daniel Yule, Luca Aerni e Justin Murisier procurar per in exploit en il slalom.

Il grond trumf è franc e segir Daniel Yule. Il skiunz vallesan è stà il pli constant en questa stagiun ed è schizunt stà classà 3 giadas en ils top 10. Tant a Levi, sco er a Zagreb ed al davos slalom a Schladming è Yule mintgamai vegnì 10avel.

Impurtant da cuntanscher resultat en top 15

In plaz en ils top 10 hai era dà per Luca Aerni, el era vegnì al slalom da chasa a Wengen 10avel. Justin Murisier ha perencunter gudagnà be ina giada puncts, quai sco 22avel al slalom da Madonna di Campiglio da fin december. Per il trio svizzer fiss impurtant da cuntanscher in resultat en ils top 15 ed uschia gudagnar puncts da la cuppa mundiala, quai per avair en l’avegnir ina meglier numer da partenza.

Marcel Hirscher e Felix Neureuther tranter ils gronds favurits

Ils gronds favurits per ils plazs sin il podest èn tranter auter l’Austriac Marcel Hirscher, ils Tudestgs Felix Neureuther e Fritz Dopfer, il Talian Stefano Gross, il Svedais Mattias Hargin, sco er il Norvegiais Henrik Kristoffersen.

Artitgels legids il pli savens