Siglir tar il cuntegn
cuntegn

Naziunal/Internaziunal Daniela Ryf fa la tripletta a Hawaii

La terza victoria en seria festivescha la triatleta svizra Daniela Ryf al Ironman sin il Hawaii. Ella supporta il meglier las strapatschas dal Ironman sin il Hawaii e gudogna cun in temp da 8:50:47 uras.

La triatleta svizra Daniela Ryf
Legenda: Daniela Ryf giubilescha suenter sia tripletta al Ironman sin il Hawaii. Keystone

Suenter il nudar aveva Ryf anc in retard da bunamain tschintg minutas. La part cun velo ha ella lura gia finì a la testa, e sin la distanza da currer ha la Svizra da 30 onns bajegià ora ses avantatg sin var 9 minutas. Ryf gudogna avant la Brita Lucy Charles e l'Australiana Sarah Crowley.

Nov record tar ils umens

Tar ils umens sa cloma il nov campiun dal Ironman Patrick Lange. Il Tudestg ch'era stà terz l'onn passà ha grazia ad ina fitg buna prestaziun en il maraton, gudagnà cun in temp da record da 8:01:39 uras. Segund daventa il Canadais Lionel Sanders, sin plazza trais arriva David McNamee da la Gronda Britannia.

Era ils megliers pateschan

Il top-favurit e cumpatriot da Lange, Jan Frodeno, ha patì da problems cun la musculatura. Uschia n'ha il victur da l'onn passà gì nagina schanza sin in bun resultat, el è daventà 65avel suenter pli che nov uras.

Per ils Svizzers è ina rangaziun en ils top 10 restà in siemi. Il meglier resultat fa Ruedi Wild sco 16avel, Jan van Berkel daventa 21avel e Ronnie Schildknecht ha stuì sa cuntentar cun plazza 30.

RR novitads 06:00