Daniel Yule uschè bun sco anc mai

Il Vallesan Daniel Yule è vegnì 6avel en il slalom a Santa Caterina. Gudagnà ha l'Austriac Marcel Hirscher avant Henrik Kristoffersen da la Norvegia ed il Russ Alexander Choroschilow.

Daniel Yule, il skiunz dal Vallais vegn 6avel a Santa Caterina

Legenda da maletgs: Daniel Yule realisescha il meglier resultat da sia carriera Keystone

Cun quest resultat ha Yule realisà il meglier resultat da sia carriera. Avant dus onns aveva el cuntanschì il 7avel plaz a Kitzbühel.

Per l'emprima giada hai er dà puncts per Marc Rochat ch'è vegnì 27avel. Per el è quai pir stà la segunda cursa sin stgalim aut. Rochat fa part al cader B. Il Vallesan era partì en il slalom cun il numer 62. En l'emprim percurs ha el fatg il pass sin posiziun 23 e la finala ha i tanschì per il 27avel plaz.

Luca Aerni ha gì discletg. El aveva ina buna posiziun da partenza sco 11avel suenter l'emprim percurs. En il segund percurs è el crudà or. Marc Gini e Bernhard Niederberger n'èn betg sa qualifitgads per il segund percurs.