Siglir tar il cuntegn

Naziunal/Internaziunal Daniel Hubmann è campiun mundial sur la distanza media

Suenter che Martin Hubmann ha gudagnà argient en il sprint ha il frar grond Daniel gudagnà la segunda medaglia per la Svizra al campiunadi mundial da cursas d’orientaziun ad Inverness en la Scozia. Daniel Hubmann ha gudagnà aur en la cursa sur la distanza media.

Purtret Daniel Hubmann, campiun mundial ad Inverness.
Legenda: Daniel Hubmann è l'emprim campiun mundial svizzer al campiunadi mundial ad Inverness. Keystone

Suenter il terz temp intermediar sa chattava Daniel Hubmann anc sin il terz plaz. Grazia ad in grondius sprint final ha il sportist dal chantun Turgovia anc pudì surpassar l’entira concurrenza ed uschia far il pass sisum il podest. Per Daniel Hubmann èsi gia il quart titel da campiun mundial en ina disciplina singula.

Daniel Hubmann ha la finala triumfà cun in avantatg da trais secundas avant il franzos Lucas Basset. Terz è vegnì il Svedais Olle Boström.

Fabian Hertner ch’è stà il pli spert sin l’emprim tschancun ha sco 5avel pers 35 secundas sin ses cumpatriot. Tar las dunnas è Sara Lüscher vegnida sco meglra Svizra 7avla. Nova campiunessa tar las dunnas è la Svedaisa Annika Billstam.

RR novitads 20.00