Siglir tar il cuntegn
Inhalt

Naziunal/Internaziunal Cuppa svizra - FCZ vegn en il final e frunta là sin YB

Grazia ad in gol en la 92avla minuta, batta il club da ballape da Turitg ils Grasshoppers cun 2:1. Ils 27 da matg giogan il FCZ ed ils Young Boys il final da la cuppa svizra.

Legria e consternaziun durant in gieu da ballape.
Legenda: Legria e consternaziun - suenter che la decisiun è crudada a favur dal FCZ. Keystone

Tard, dentant betg memia tard han ils giugaders dal FCZ racoltà il fritg da lur prestaziun pli solida en la segunda mesadad. En la 92avla minuta marca Cédric Brunner cun in ferm sajet il gol decisiv al 2:1, suenter che GC n'aveva betg spedì davent avunda la balla suenter in culp liber.

Ils Grasshoppers avevan cumenzà meglier la partida, e gia en la 11avla minuta èn els ids en avantatg. Dentant gia diesch minutas pli tard ha Kevin Rüegg pudì egualisar, suenter in pass dubel cun Raphael Dwamena.

Il FCZ è uschia per la 11avla giada en in final da la cuppa svizra, la davosa giada pir il 2016. Cunter l'adversari da quest onn ils Young Boys n'èn ils Turitgais anc mai stads en il final.

RR novitads 23:00