Siglir tar il cuntegn
Inhalt

Naziunal/Internaziunal Cuppa Spengler 2015: Damain giugaders en la prolungaziun

Cun la midada da reglas vulan ils responsabels da la Cuppa Spengler dapli controlla dal gieu e dapli tensiun. Perquai vegnan surpigliadas 2 reglas da la federaziun naziunala da hockey americana (NHL).

logo cuppa spengler en culissa da naiv
Legenda: La Cuppa Spengler 2015 gudogna tensiun tras las novas reglas, communitgeschan ils responsabels. swiss-image.ch

A la Cuppa Spengler vegn giugà tenor las reglas da la federaziun internaziunala da hockey sin glatsch. Sper questas han ils organisaturs decidì da surpigliar anc 2 midaments che la liga naziunala da hockey americana ha fatg:

  • Il dretg dal trenader da pretender ina cumprova da video
  • En la prolungaziun giogan 3 encunter 3 giugaders sin il champ (endstagl 4 vs. 4)

Cumprova da video, però cun limitas

Il trenader po pretender ina cumprova da video suenter in gol, sch'el pretenda ch'i saja stà "offside", ubain sch'el vul far valair ch'il goalie saja vegnì disturbà. Per evitar ch'i dettia memia bleras pretensiuns ed interrupziuns è quai dretg cundiziunà: Sch'il video mussa ch'il trenader n'ha betg gì raschun, lura perda el il dretg per l'entira partida.

Dapli tensiun e damain sajettar penalties cun 3 vs. 3

Sco quai ch'ils responsabels da la Cuppa Spengler communitgeschan, haja la pratica da laschar giugar 3 encunter 3 en la prolungaziun mussà tar la liga da hockey naziunala americana, che dapli gieus vegnan decidids aifer il temp supplementar. Ina regla che la liga naziunala A vegn era a surpigliar en la proxima stagiun.

RR novitads 09:00