Siglir tar il cuntegn

Header

Navigaziun

Tom Lüthi durant ina cursa da moto2.
Legenda: Il mument na vai betg sco giavischà al pilot Bernais Tom Lüthi. Keystone
cuntegn

Naziunal/Internaziunal Cupitgada custa a Lüthi in plaz da podest

Il pilot da töff svizzer Tom Lüthi ha dà oda maun in plaz da podest en la cursa da moto2 al grond premi da l’Australia a Phillip Island. Suenter ina cupitgada ha Lüthi stuì sa cuntentar cun il 15avel plaz.

Enfin 9 rundas avant la fin era Tom Lüthi sin buna via da gudagnar ses terz plaz da podest en questa stagiun, l’emprim dapi sia victoria il matg al grond premi da la Frantscha. Lura è Tom Lüthi ruschnà davent da la pista en ina storta ed è cupitgà. Quai ha custà ad el in plaz da podest.

Gudagnà la cursa da moto2 ha la finala il Spagnol Alex Rins avant il Brit Sam Lowes ed il Talian Lorenzo Baldassarri.

Exploit da Krummenacher

Malgrà la trumpada da Tom Lüthi datti tuttina ina buna novitad ord vista svizra. Randy Krummenacher ha cuntanschì l’arrivada sco 10avel suenter ch’el era anc partì da la posiziun 21. Manchentà per pauc in plaz en ils punts ha il Svizzer Jesko Raffin sco 17avel. Crudà ora è Robin Mulhauser. Dominique Aegerter n’è danovamain betg stà a la partenza suenter ses accident al grond premi d’Aragonia.

Tensiun e spectacul

Procurà per grond spectacul han ils pilots da la classa roiala motoGP. Ditg è il Spagnol Jorge Lorenzo stà a la testa. Pir en la davosa runda ha el stuì laschar surpassar ses cumpatriot Marc Marquez. Profità da quai ha er Valentino Rossi. Il leader talian ha uschia pers be 7 puncts sin Lorenzo en il classament general. Rossi ha terminà la cursa a Phillip Island sin il quart plaz davos il Talian Andrea Iannone. En il cumbat per il titel da campiun mundial maina Rossi “The Doctor” duas cursas avant la fin cun 11 puncts avant Jorge Lorenzo.

Sin il program stattan anc duas cursas, ils 25 d’october il grond premi da la Malaisia e ils 8 da november il final a Valencia.

RR novitads 08.00