Siglir tar il cuntegn
Inhalt

Naziunal/Internaziunal Cup svizzer: FCB e Sion en il final

Il FC Basilea ha battì il FC Winterthur cun 3:1. Il FC Sion ha gudagnà cunter il FC Lucerna cun 6:5 suenter penaltis.

Ballapedists.
Legenda: Il FCB ballucca cunter il FC Winterthur, ma na croda betg. Keystone

En il mezfinal da la cuppa da ballape svizra gudogna l'FC Basilea cunter il FC Winterthur ordaifer cun 3:1. Uschia sa qualifitgescha Basilea sco emprima squadra per il final da la cuppa svizra.

Il FCB ha però gì bregia cunter il davos da la Challenge League. Tranter auter han ils da Basilea profità d'ina decisiun dispitaivla da l'arbitrader ch'ha la finala manà al 1:0 tras penalti. Suenter l'emprima mesadad stevi pari 0:0.

Sion – Lucerna 6:5 suenter penaltis

En il segund mezfinal han ils penaltis stuì decider la partida in extremis. Suenter 120 minutas stevi pari 0:0. La meglra schanza en ina partida gulivada han gì ils giasts da Lucerna curt avant la fin da la prolungaziun. Sion cuntanscha grazia a questa victoria per la 14avla giada il final dal Cup svizzer.

Statistica per Sion

Gia avant dus onns han Basilea e Sion battì per il titel. Lura aveva Sion gudagnà cleramain cun 3:0. Fin uss han ils Vallesans cuntanschì 13 giadas il final dal Cup svizzer – e fin uss er gudagnà quel 13 giadas. Perquai vala Sion er sco «spezialist dal cup».

Il FCB ha la schanza da gudagnar l'emprim dubel dapi il 2012. Ils davos 10 onns è Basilea sa qualifitgà per il final dal cup – trais giadas en seria han ils da Basilea pers il final tranter ils onns 2013 e 2015.

Il final dal Cup svizzer è ils 25 da matg 2017 en il Stade de Genève.

RR novitads 21:00