Siglir tar il cuntegn

Header

cuntegn

Naziunal/Internaziunal Cundiziuns perfetgas a Lantsch

Dapi in’emna treneschan e sa preparan ils biatlets da la naziunala Svizra a Lantsch sin la nova stagiun da biatlon. Grazia a la nov’arena e la nova tecnologia da far naiv «Snowfactory» pon ils Svizzers trenar gia l’entschatta da november sin la naiv da cundiziuns optimalas.

audio
Biatlets Svizzers sa preparan a Lantsch
ord Sportissimo dals 04.11.2017.
laschar ir. Durada: 2 minutas 11 Secundas.

A Lantsch pon biatletas e biatlets svizzers currer sin ina loipa da bunamain dus kilometers enturn l’arena da biatlon cun in stan da sajettar cun 30 schibas sin la distanza originala da 50 meters. Anc avant paucs onns stuevan Selina Gasparin u Serafin Wiestner vegnir a frida cun pauc. Wiestner trenava da sajettar tar el a Trin insanua a l’ur da loipa sin ina schiba fermada vid in clavà. Betg auter è Selina Gasparin anc sa preparada sin ils davos gieus olimpics a Sotschi il 2014 nua che la pioniera svizra da biatlon è la finala turnada a chasa cun ina medaglia d’argient.

Nus essan fitg leds che nus avain uschè bunas cundiziuns qua a chasa, quai n’han betg bleras naziuns. Uschia sperain nus sa chapescha che quai saja in plus.
Autur: Serafin Wiestner biatlet

Il mund da biatlon è sa midà dal tuttafatg en Svizra. Adina daplirs èn fascinads da questa cumbinaziun da passlung e sajettar e cumenzan uschia a far biatlon. E grazia a tals indrizs sco a Lantsch po la Svizra er concurrenzar cun las grondas naziuns da quest sport. Actualmain èn era a Lantsch las equipas naziunalas da la Germania e l’Austria vid il trenar. Proximamain suondan lura anc ils Franzos.

Pyeongchang 2018

La nova stagiun da biatlon cumenza la fin da november cun las emprimas cursas da la cuppa mundiala ad Östersund en Svezia. Il punct culminant suonda il favrer 2018 cun ils gieus olimpics a Pyeongchang en la Corea dal Sid.

RR Sportissimo 17:00

Artitgels legids il pli savens