Plinavant ha Nino Schurter survegnì nova concurrenza. Ils giuvens atlets han savurà la pulvra co batter il campiun olimpic e campiun mundial da seria. Quai hai il mountainbiker oriund da Tersnaus sentì avant in’emna a las sulettas cursas da la cuppa mundiala en questa stagiun a Nove Mesto en Tschechia.
Igl ha er gia vis ora meglier per mai.
Quittads na fa Nino Schurter dentant betg. I saja bun ch’el haja survegnì nova concurrenza e ch’i sajan uss fatschas novas a la testa. Quai motiveschi er el e mantegnia el giuvens, di Nino Schurter cun in surrir. E pertutgant las cundiziuns saja tut pussibel en questa cursa a Leogang. Il recept da success saja da mitschar atras senza pli gronds sbagls, mo el dubitia ch’insatgi vegnia tras questa buglia senza defects u senza cupitgar in u l’autra giada. I saja simplamain da star «cools» di Nino Schurter ch’ha la schanza da gudagnar ses 9avel titel da campiun mundial, il 6avel en seria.
Bunas regurdientschas
Quai che tschantscha per Nino Schurter è l’experientscha, la rutina. Plinavant ha il mountainbiker da 34 onns bunas regurdientschas da Leogang. Il 2012, curt suenter ils gieus olimpics a Londra nua ch’el ha gudagnà argient, è Schurter daventà en questa regiun per la segunda giada campiun mundial, quai avant ils dus frars Lukas e Mathias Flückiger.
