Crisa da Vögele cuntinuescha

Per Stefanie Vögele è il turnier da tennis a Taschkent a fin suenter la prima runda. La Svizra ha pers la partida cunter la svedaisa Johanna Larsson (WTA 61) cun 3:6 e 3:6.

Stefanie Vögele è focussada sin il bal.

Legenda da maletgs: Stefanie Vögele ha da cumbatter cun problems persunals. EQ Images

Vögele ha il mument da sbatter cun ina greva fasa. Dapi mez matg e l’8avel final a Nürnberg spetga ella sin ina victoria. En la rangaziun mundiala è Vögele entant gia crudada enavos sin posiziun 143.

Problems persunals

«Quai n’ha betg da far cun mes gieu, mabain cun problems persunals. Mes bab è mort l’onn passà suenter ina maslogna e quai è anc adina en mes chau sche jau dun tennis», ha la giuvna da 25 onns declerà envers ils organisaturs.

RR novitads 14:00