Siglir tar il cuntegn
Inhalt

Naziunal/Internaziunal Corsin Hösli - vinavant senza Swiss-Ski

Suenter ch'il giuven da Zernez è vegnì bittà or dal cader da trenament da Swiss-Ski vul el cuntinuar sin agen cust.

purtret da Corsin Hösli, passlungist
Legenda: Corsin Hösli cuntinuescha carriera senza Swiss-Ski mad

Betg buns avunda - ti pos ir! Questa nauscha novitad ha il currider da passlung Corsin Hösli gì da magunar quests dis. Perquai che ses resultats na sajan betg buns avunda ha Swiss-Ski bittà or el dals caders da trenament.

Dumagnà il cancer dal sang e la fevra da Pfeiffer

Trenà ha el onns en ed onns ora. Adina cun la finamira da pudair prender part insacura a campiunadis mundials e gieus olimpics. E lura - dad in mument a l'auter - duess tut esser a fin. Questa situaziun enconuscha Corsin Hösli da Zernez. Adina puspè è el vegnì franà en sia carriera da passlung. Cun 15 onns ha el survegnì la diagnosa brutala ch'el haja cancer dal sang, leuchemia. Mo Corsin Hösli ha cumbattì cun success la malsogna ed ha cuntinuà a far sport sin aut livel. Lura, avant trais onns, ha la fevra da Pfeiffer franà el. Anc ina giada è Hösli turnà, ha pudì far singulas cursas en la cuppa mundiala ed è vegnì 11avel al campiunadi mundial dals U23.

Nova vita en Norvegia

Mo Curdin Hösli vul turnar e va perquai novas vias. El sa prepara ad Oslo, sia nova patria, per ses return en la cuppa mundiala. En la chapitala norvegiaisa sto Hösli organisar e finanziar tut sez. Mo quai po er esser ina schanza: Star sin ils agens pes e turnar pli ferm ch'avant.