Siglir tar il cuntegn

Header

cuntegn

Naziunal/Internaziunal Constantin ha uss da guardar ballape a la televisiun

La Swiss Football League SFL scumonda al president dal FC Sion per 14 mais l'access a stadions da ballape ed al fa pajar in chasti da 100'000 francs. Quai, perquai che Constantin aveva attatgà l'expert da televisiun ed anteriur trenader da la squadra da ballape naziunala svizra Rolf Fringer.

Per 14 mais na dastga Christian Constantin, il president dal FC Sion, betg pli ir en in stadion, tar ina plazza da gieu, tar la zona tecnica, en la cabina da la squadra u en la zona mixed.

Quest scumond vala per tut ils gieus da la Super League, la Challenge League, la Coppa svizra e la squadra naziunala A. En pli fa la cumissiun disziplinara da la Swiss Football League pajar a Constantin ina multa da 100'000 francs.

Christian Constantin era sez ì en l'offensiva.

Il president dal FC Sion Christian Constantin porta plant cunter Rolf Fringer, l’anteriur trenader da la squadra naziunala svizra. Quai ha Constantin confermà envers l’agentura da novitads sda. Constantin renfatscha a Fringer d’avair disfamà el. El haja gia pliras giadas ditg a Fringer, ch'el na tolereschia betg pli sia critica.

Suenter la partida da Lugano cunter Sion aveva Constantin attatgà Fringer corporalmain – stuschà enturn quel e dà schlaffadas. Fringer era engaschà per la partida sco expert da l'emettur Teleclub. L’Associaziun svizra da ballape investighescha en quest connex cunter il president dal FC Sion.

RR novitads 11:30

Artitgels legids il pli savens