Siglir tar il cuntegn

Header

cuntegn

Claudio Cadonau En paucas minutas da 100 sin 0

Claudio Cadonau che dat dapi questa stagiun tar l'EV Zug è be in da numerus giugaders e clubs da hockey ch'èn vegnids bandischads en quarantina da corona. Cunquai ch'el ha ina chasa en Surselva è ses temp d'isolaziun stà meglier da supportar.

La damaun dals 30 d'october anc trenà e mental gia tar il gieu da la saira encunter ses anteriur club, ils SCL Tigers, cura che l'entira equipa da l'EV Zug è vegnida spedida a chasa pervi d'in cas positiv da Covid-19. Il temp da 10 dis da quarantina n'è betg stà d'evitar. Tge che Claudio Cadonau ha pudì evitar – da stuair stà a Zug en ina stanza.

Il hockeyan da 32 onns ch'ha sias ragischs oriundas en Surselva ha survegnì il consentiment da ses medi da passentar il temp d'isolaziun en sia chasa a Vuorz. Là ha el era pudì far inqual trenament ora en curtin, dasper far ora laina ed uschia laschar ora energias.

audio
Il hockeyan Claudio Cadonau e ses temp en quarantina
ord Actualitad dals 10.11.2020. Maletg: MAD
laschar ir. Durada: 3 minutas 49 Secundas.

Abstrahà da tut las restricziuns e prescripziuns pervi da la pandemia, ha Claudio Cadonau gì in bun cumenzament tar ses nov patrun l'EV Zug. Suenter che plirs defensurs han bandunà il club è el il sulet nov cun blera rutina en quella posiziun. Dal trenader survegn el suenter ils emprims 7 gieus – che Zug ha gudagnà 6 – bler laud. Quel cun il numer 34 sin ses tricot engrazia e vul optimar sias qualitads defensivas e gugent era dar vinavant sias experientschas dad onns e tar numerus clubs als pli giuvens en l'equipa.

L'EV Zug è avanzà ad in top club en la pli auta liga svizra da hockey che maschaida cun davanttiers en la tabella e ch'ha ina gronda finamira. Puspè ina giada ir per il titel da campiuns svizzers, tge ch'è stà il cas l'ultima giada l'onn 1998.

audio
Claudio Cadonau e ses cumenzament sportiv tar l'EV Zug
ord Actualitad dals 10.11.2020. Maletg: RTR
laschar ir. Durada: 3 minutas 52 Secundas.

Ma sch'i gartegia en questa stagiun cun ils playoffs u sche corona lavaga anc ina giada il pli bel temp da l'onn dals hockeyans, stat il mument en las stailas. Ed igl è da prender da gieu a gieu.

RTR actualitad 17:00

Artitgels legids il pli savens