La gruppa da hackers russa Fancy Bears ha fatg accessibla in'ulteriura retscha da rapports medicinals da top-atlets, engulads da servers da l'Agentura mundiala anti-doping WADA. Quels rapports cuntegnan lubientschas excepziunalas, che han lubì ad atlets da duvrar substanzas scumandadas ord raschuns medicinalas.
Nino Schurter e Fabian Cancellara n'han uschia betg cuntrafatg a las reglas da doping. Ils cas dals atlets svizzers èn 3 u dapli onns enavos. Schurter duai avair survegnì trais giadas ina tala lubientscha (2008, 2009 e 2010), Cancellara duas giadas (2011 e 2013).
Las davosas emnas ha la gruppa da hackers Fancy Bears publitgà 107 sportists che han survegnì lubientschas excepziunalas. Tranter auters èn quai stads ils stars da tennis Rafael Nadal e Serena Williams, il curridur Mo Farah e la gimnasta Simone Biles.
RR novitads 20:00