Siglir tar il cuntegn

Naziunal/Internaziunal Canada ha da dar tut – Magnitogorsk turna a Cuppa Spengler 2018

Ina da las meglras equipas da hockey da la Russia dat a la proxima Cuppa Spengler a Tavau. Ils organisaturs han annunzià il mardi las sis equipas che dattan al turnier tranter Nadal e Bumaun. Ina da quellas è Metallurg Magnitogorsk, ina da las equipas dominantas da la KHL.

El cun la coppa.
Legenda: Team Canada è il 2018 defensur dal titel – David McIntyre cun la coppa Spengler suenter la 91avla ediziun. Keystone

Als organisaturs da la Cuppa Spengler èsi reussì d'engaschar ina da las pli fermas equipas da la KHL, la Kontinental Hockey League: Metallurg Magnitogorsk è il campiun da la KHL dals onns 2014 e 2016. La KHL è la pli ferma liga da hockey da l’Europa. Ella vegn dominada dad equipas russas e cumplettada cun fermas equipas da divers pajais vischins.

La davosa visita da Magnitogorsk è en buna memoria

La davosa giada che Magnitogorsk ha dà a Tavau è gia in temp enavos. L’onn 2005 avevan ils Russ battì en il final il Team Canada gist cun 8:3.

Ils Canadais sco defensurs dal titel èn danovamain da la partida, exact sco l'equipa ospitanta, il Club da hockey da Tavau. Omaduas equipas han gudagnà mintgamai 15 giadas la Cuppa Spengler.

Trais equipas novas al turnier

Per l'emprima giada a la Cuppa Spengler è il vicecampiun tschec Ocelari Trinec. Trenader dal vicecampiun tschec è Vaclav Varada. La stagiun 2006/2007 aveva Varada gudagnà sco giugader cun il Club da hockey da Tavau la Cuppa Spengler ed il titel da campiun svizzer.

Medemamain per l’emprima giada al turnier tranter Nadal e Bumaun èn il club finlandais KalPa Kuopio e da la Germania ils Ice Tigers da Nürnberg cun trais vicecampiuns olimpics en lur retschas. A Pyeongchang avevan Yasin Ehliz, Patrick Reimer e Leo Pföderl gudagnà cun la Germania argient.

RR novitads 17:00