Aksel Lund Svindal sto terminar la stagiun da skis actuala. Il Norvegiais ha stuì operar in'ulteriura giada il schanugl dretg. Ils problems cun il schanugl operà èn s’intensivads suenter la cursa a Val Gardena.
La stagiun passada aveva el rut il liom dal schanugl ed il meniscus dal schanugl dretg suenter ina crudada a la cursa rapida a Kitzbühel. Cun trais plazzas da podest en las emprimas quatter cursas da las disciplinas spertas è Svindal turnà persvadent en il circus da skis.
Er Ligety sto dar forfait
L'American ha stuì laschar operar la chomma sanestra. Per el va uschia a fin anticipadamain in'ulteriura stagiun. Sco quai che Ligety ha scrit sin Instagram haja el problem cun il sistem da la gnerva en la chomma.
Dapi il cumenzament da la stagiu a Sölden en l'Austria haja el mal, uschia il skiunz american vinavant. Tut ils tractaments e terapias per guntgir in'operaziun n'hajan purtà nagut. A San Murezzan fiss Ligety stà per la segunda giada defensur dal titel. Gia la stagiun passada ha Ted Ligety stuì terminar anticipadamain pervi dad ina blessura.
RR novitads 14:00